مهندسون ولكن أدباء- م/ محمد امين
“سؤال بسيط”
قصة قصيرة للمهندس/ محمد امين محمد
**.**.**.**.**
– بقولك ايه يا محمد أنت خارج بره الشركة؟
– ايوه يا باشمهندس شريف، رايح أجيب فطار، أجيب لك حاجة معايا.
– هتعدى على صيدلية؟
– ايوه على كذا صيدلية .
– تمام أنا بس نسيت دواء الضغط وكنت عايز تجيب لى شريط.
– من عينيا يا هندسة.
– خد خمسين جنيه، تقريبا الشريط ب 32 جنيه.
– اسمه ايه يا هندسة؟
– ثانية واحدة أسأل المدام.
– المدام هتجيبهولك؟ .
– هى لسه هاتجيبه ما هى جابته خلاص .
– طب هو ايه؟.
– الضغط يا ابني، آه أنت قصدك الاسم، ثواني بس ترد مش عارف بترغى مع مين .
****
بعد انتظار نصف ساعة، قال محمد بحزن: يا هندسة مش مشكلة أبقى اخرج عشان الدوا مرة تانى، الناس جاعت.
– لا حول ولا قوة إلا بالله مش عارف أقولك ايه، بترغى فى ايه بقالها ساعة مش عارف، استنى، ردت أخيرا.
– الو ايوه يا ماما ساعة شاغلة التليفون، بقولك ايه
– …
– ايه ده، معلش ما هى أتجوزت واتطلقت يجى عشرين مره قبل كده.
– …
– الدنيا بتمطر، طب معلش اللهم صيبا نافعا، معلش ربنا يعوض عليكى اغسلي تانى، كنت عايز أسألك عن حاجة
– …
– يا ستى انا عارف أنها مش حاجة سهلة استغفر الله العظيم يارب
– …
– مين اللى بينقط
– ….
– آه طب ألف مبروك، لما ارجع بقى، طب عشان أنا موقف الراجل بس
– ….
– يووووه لا ماعنديش مشكلة نفسية أو عضوية أجيب السباك يصلح الخلاط .
– …
– ممكن نأجل موضوع الأكل ده دقيقتين أنا عارف أن القلقاس خلقة ربنا، لا حول ولا قوة إلا بالله
– ….
– بقولك اسم الد .. ، ااااااه
– …
– يا مدام ..، أنا محمد اللى شغال مع أستاذ شريف فى المكتب، دواء الضغط اسمه ايه؟ عشان هو أغمى عليه دلوقتى.
**.**.**.**
التعليقات مغلقة